قصه أتمنى تقرونها ( معاناتي انا واخوي ) اول مشاركه لي :)

طاح حظك يالببسي من يوم طلع ريد بووول اللي بيعطيك جوانح .. هجل النويعم أبو خدود ورديه ياكل العسل والخشن أبو شنب ياكل تبن .. بس تدرون عاد قالوها اللي قبلنا لكل زمان دولة ورجال ما دامت لهتلر وصدام عشان تدوم لمحمد جابر وفيصل سعيد << طراها عبداللطيف جميل





في سنتن من السنين في ربوع حايل وعود الموز مايل كنت أنا يا محمد جابر وأخوي فيصل سعيد نشتغل مدرسين في قرية تابعة لمنطقة حايل أسمها ساحوت وبعض أهل العلم يسمونها الطريق اللي يودي ما يجيب كنا معنيين في تعليم النشء وتربية الأطفال لتخريج جيل متعلم واعي من الساحوتيين




كنت أنا مدرس عربي وأخوي فيصل مدرس دين حاولنا نخلي تعيينا في الرياض بس مدير إدارة التعليم في ذلك الحين كان يكره والدي لأن أبوي كد تزوج أخته وطلقها في أيام الشباب قبل نلفي على الدنيا أنا وأخوي فيصل مالكم في الطويلة رضخنا للأمر الواقع ورحنا نداوم في قرية ساحوت طبعاً تكبدنا متاعب الرحلة لأنها كانت متعبة وشاقة لأننا تبهذلنا وأكلنا من التبن كيلو لين وصلنا للقرية المذكورة سلفاً << سلفاً ولا ديناً طراها مصالة بعض الأخوه الزوار





وصلنا للقرية بفضل الله ومنته وكانت قرية كئيبه جداً أكثر ما رئينا فيها هي الدواب السائبة وأغلب منازل هذه القرية هي خيمة وبيت شعر وقليل منها بيوت طين وبلك بس الخيمة أرحم من البيوت هاذي لأن الخيمة شكلها مألوف بس البيوت شكلها موحش كل ما نظرت إليها تذكرت بيت العجوز الخضراء اللي مع بباي







مشينا نبحث عن مأوا لنا بس ما حصلنا لا شقق مفروشه ولا شقق ما هي مفروشه رحنا نسأل عن المدرسة اللي تعينا فيها وحنا نمشي ندور أحد نسأله حصلنا محطة بنزين فيها مضخه وحده وكشك على شكل بقاله وجنبه حوش غنم دخلنا الكشك حصلنا فيه هندي بس ما عرفنا أنه هندي ألا يوم شمينا ريحة الفلفل ولا ملامحه كنه من البدو المستعربه لأن عوامل التعريه والبيئه مرت عليه بشكل موحف لأننا أول ما دخلنا وسلمنا عليه رد علينا وقال يا هلا ويا مرحبا أرحبوا والله أن ترحبوا سئلناه عن المدرسة وأشار لنا أن نذهب إلى مركز القرية وهو اللي راح يدلنا ويسنعنا .


وصلنا لمركز القرية وكان مبنى صغير جداً وآيل لسقوط والدرايش فاتحه ومكسره وعلم المملكة فوق المركز بس متشقق من أثار عوامل التعرية .. أول ما دخلنا ما حصلنا أحد مدري ليه في ذلك الوقت طرت علي الجوازات وقلت في نفسي سقى الله أيامك بالخير يالجوازات لو يعدون ويحصون المراجعين اللي دخلوا من بابك لمدة ساعة يمكن يساوون عدد سكان حايل المهم أننا طلعنا من الباب الخلفي للمركز ووجدنا شخص جالس على دكة ومعه أرقيله ( شيشه ) وقاعد يجر الأرقيله وجنبه مسجل كبير من أيام زمان يا فن ومشغل أغنية سميرة توفيق ( يابو قضاضه بيضاء ) ومنطرب الشخص أنطراب منقطع النظير << يلعن أبو التعبير اللي تعرفه





سلمنا عليه ورحب فينا ونادا على الغلام عشان يذبح الذبيحة فرحاً في قدومنا وكرم ضيافة منقطع النظير عرفناه في أنفسنا وقلنا له حنا المدرسين الجدد اللي عينتنا الوزارة في هذه القرية الجميلة انبسط علينا وفرح من طريقتنا ومن دلعنا على قولته إذا تقامزنا وخفنا ورعبنا من شوفة عقارب قاعده تتمشى في الدكة اللي قهرني أني شفت خلية نحل وشفت خلية نمل بس أول مرة بحياتي أشوف خلية عقارب



رئيس المركز أسمه أبو ملوح وكان شخص مرح جداً وهو الوحيد اللي في القرية معه شهادة ثاني إبتدائي وأيضاً هو الوحيد في القرية اللي كد سافر برا القرية وله سفرات لشام وللعراق في أيام شبابه لأنه سولف لنا عن سهراته وسمراته أيام عروس المحطة وسميرة توفيق وحي الطرب




سئلناه عن موقع المدرسة وعن الموقع اللي نستطيع أن نقيم فيه قال لنا أصبروا فيه خيمة عمودين نبي ننصبها لكم تبي تكون هي المدرسة وهي مقر أقامتكم :eek: رضخنا للأمر الواقع ولنصيب اللي حذفنا على هذه القرية وقلنا نصبر لين تجي حركة النقل ولا أبوي يدبر لنا واسطة وننقل للرياض لأنه واعدنا يقول داوموا هناك وما يخلص الحول ألا أنا مدبر لكم واسطة وجايبكم عندي




بدينا الأيام الأولى من بداية العام الدراسي وحنا في قمة الأحباط كل بزر يجي للمدرسة لازم يجيب معه حيوان اللي يجيب معه عنز واللي يجيب معه كلب واللي يجيب معه ضب والله أني كنت خايف فيه أحد منهم يجيب معه ذيب لأن أشكال البزران موحشه ومتدربين تدريب قوي على التعامل مع الحيونات الآليفه والمتوحشه ولو شغلتهم في سيرك يبي يبدعون :الفله.:




كنت أنا مدير المدرسة ( الخيمة عمودين ) وأخوي الوكيل والهندي العامل في المحطة هو الفراش بعد فترة ليست بالقصيرة صرنا نتعايش مع الوضع وأنسجمنا وصرنا نحاول نتأقلم معهم ونسوي زيهم واللي هون علينا التعب والحظ الردي هو شيء واحد بس الموووووووت يا مدير الشرطة



بنت رئيس المركز وأسمها مزنه وتشق الأرض من جمالها وصوتها وحلاوة لسانها الحايلي اللي ينقط عسل لأنها كانت هي اللي تجيب لنا الفطور والغداء والعشاء وكانت تسولف معنا وتحاول أنها تتعلم منا أي شيء لأنها كانت تسمع عن الحضاره في الرياض وتسمينا الحضر وأمنيتها تجي الرياض عشان تذوق السفن آب لأنها كانت تسمع أن السفن آب اللي يشرب منه جغمه مستحيل يموت <<< يلعن أبو هيك تخلف



المهم أني أنا وأخوي كلنا طحنا في غرامها وفي حبها تخبرون عاد وضعنا لا نت ولا روتانا سينما ولا حتى القناة الأولى ونهى الناظر صرت أنا وأخوي دايم نتهاوش وتصير بينا خلافات حاده على منهو اللي ياخذ الصحن منها حتى أني مره جلست ماكلم أخوي شهر كامل لأننا كنا متفقين كل يوم على واحد ياخذ الصحن منها ويسولف معها وكان اليوم يومي بس أني من شدت التعب من التعامل مع البزران نمت وقلت لخوي صحني إذا جت مزنه والدولاب ماصحاني وهو اللي اخذ الصحن منها




انقطعت عنا مزنه ولا صارت تجيب لنا الأكل وصار اللي يجيبه الهندي العامل في المحطة وفراش المدرسة وصرنا في حالة يرثى لها وفي يوم من الأيام جانا رئيس المركز في صفرة المغرب وطلب مننا نكتب له خطاب لأمارة منطقة حايل علشان يصلحون في ساحوت وحده صحيه لأن ساحوت لا يوجد فيها وحده صحيه وقلنا له يا طويل العمر ليه ما طلبت وحده صحيه من زمان قال تعبت وأنا أطلب ومن كثر ما نشبت لهم جابوكم لي يبي يسكتوني فيكم بس الحين بنشب لهم لين يجيبون لنا الوحدة << الوحدة ولا الأهلي طراها مصالة بعض الزملاء




قلنا له يابو ملوح طيب اطلع للأمارة وتفاهم معهم فيس تو فيس قال ما قدر اطلع واخلي بنتي لحالها وهي في الحاله هاذي :eek: قلنا بصوت واحد وش فيها مزنه ؟؟؟ قال مزنه تعبانه ومريضة والظاهر أنها الان في حالة احتظار هذا كلام الشيخ .. صعقت من الخبر هذا وكنك كاب علي بنزين ومولع فيني ضغطنا على رئيس المركز أنه يجيب أسعاف من حايل عشان ننقل مزنه لحايل تتعالج هناك وبعد ضغط مميت منا وافق رئيس المركز أنه يروح لحايل وقال من بكره الصبح أنا طالع لحايل وبجيب الاسعاف .




يوم جاء الصبح طلعنا لبيت أبو ملوح ولقينا الناس مجتمعه وصياح حريم ودموع رجال وعرفنا أن مزنه ماتت وكل أهل ساحوت حزنوا عليها لأنها هي الوردة اللي كانت مشعله القريه نور وسرور حتى الحيوانات حزنوا عليها حتى الشجر حتى الصحن اللي كانت تجيبه لنا




ماتت مزنه ايه ماتت مزنه الله يرحم مزنه ماتت وهي مشتهيه السفن آب
أتمنى ما طولت عليكم با القصه << طولت وسمجتهااا




استحملو عاد --- واتمنى الردود السنعه





يا حليلكم والله < < يدهن السير

ههههههههههههههههههههههه

الله يرج بليسكم

ههههههههههههههههههههههه

مسكينه ماتت الله يرحمها قصة نهايتها مؤلمة

ههههههههههههههههههههههه

بس بجد هذي قصتكم ولا قاعد تضحك علينا ..!! هههههههههه

وأمنيتها تجي الرياض عشان تذوق السفن آب لأنها كانت تسمع أن السفن آب اللي يشرب منه جغمه مستحيل يموت <<< يلعن أبو هيك تخلف

هههههههههههههههههههههههههههههههههههههههههههه


الله يرحمها هههههههههههههههههههههه رجك الله رجاً مبرحاً ......

اي بس مو بها الوحشيه كان كل شي والم < يعني جاهز وواصل لهم كل الخدماات


بس قلت املحهااا وانزلها لانها مرحله لن تتغير بحياتي


شكرآآ آختي نور على مرورك اللي نور الصفحات في ها القصه المتواضعه

تقبلي تحيااتي

هههههههه لبىىىى قلبك يا اصغر ( ما تصدق وش كثر اسعدني مرورك ) < يدهن السير عشان ترد